Sunday Times Books LIVE Community Sign up

Login to Sunday Times Books LIVE

Forgotten password?

Forgotten your password?

Enter your username or email address and we'll send you reset instructions

Sunday Times Books LIVE

LAPA Uitgewers

@ Sunday Times Books LIVE

Archive for the ‘New Releases’ Category

Jaco Jacobs wen Tienie Holloway-medalje vir Kleuterliteratuur

Jaco Jacobs doen dit weer!

Die Akademie vir Wetenskap en Kuns het op 13 April 2018 aangekondig dat Jaco Jacobs bekroon gaan word met die Tienie Holloway-medalje vir Kleuterliteratuur vir sy boek Grom.

Die Tienie Holloway-Medalje vir Kleuterliteratuur word driejaarliks toegeken aan die skrywer wat die beste werk in Afrikaans gelewer het in die genre van kleuterliteratuur. Die boek is deur Karen Lilje geïllustreer.

Die ATKV het ’n deel van die prysgeld geskenk, maar was nie betrokke by die toeken van die prys nie.

Grom handel oor Emma, ’n dogtertjie wat nie hou daarvan om op te staan nie. Sy grom vir haar ouers wanneer hulle haar wil wakker maak. Toe, een oggend, toe sy in die spieël kyk… het sy snorbaarde en kolle oral oor haar lyf!

Beide Jaco Jacobs en Karen Lilje is in 2017 vereer met ’n ATKV-Woordveertjie vir Grom. Dié prys is deur kinderlesers aan hulle toegeken. Jaco het die ontvangs daarvan gesê dat sy eie dogtertjie se oggendgromme hom geïnspireer het om die boek te skryf.

Boekbesonderhede


» read article

Die Vyfde Aspoester delf in die lewenslange invloed wat geweld (in al sy vorms) op die psige van ’n mens kan hê

Dié boek gaan jou in die maag skop.

Die vyfde Aspoester begin met ’n donkerkopmeisie wie se liggaam in ’n agteraf hotel in ’n Aspoester-uniform gevind word. Haar linkervoet se tone is afgesny sodat die voet in die glasskoen kon pas. Haar oë is netjies verwyder. Daarna is haar nekaar gekloof sodat sy kon doodbloei.

“Hoe sal jy voel as ek dieselfde met jóú dogter doen? Haar naam is mos Franci?” Dit is wat die elektronies vermomde stem vir doktor Olaf Demeyer, forensiese profileerder, vra terwyl hy die dossierfoto’s van die moordtoneel bestudeer.

“Hoekom sou jy dieselfde met my dogter wou doen?”

’n Koggellaggie klink op. “Dit is wat jy moet uitvind, Doktor. Kom ons kyk of jy werklik so baie vir verontregde vroue omgee soos wat die media beweer. En kom ons kyk of jy my betyds met jou agtste sintuig kan uitoorlê.”

Die lyke van nog drie meisies word binne ’n paar dae gevind. Olaf besef hy sal baie diep in sy eie donker profiel moet delf na die waarheid as hy wil verhoed dat sy enigste dogter die vyfde slagoffer van die Aspoestermoordenaar word.

Herinneringe aan sy traumatiese kinderjare, sy oordrewe skuldgevoelens en sy fobie vir lemme, maak nie sy taak vir hom ligter nie. Intussen voel hy hoe die uurglas baie vinnig vir Franci leeg loop.

Wat maak die boek anders? Die Vyfde Aspoester delf in die lewenslange invloed wat gesinsgeweld, asook geweld in die algemeen, op die psige van ’n mens kan hê. Dit ondersoek ook die invloed wat geweld teen vroue en kinders op die samelewing het. Kwessies soos pedofilie, geestesversteuring en seksverslawing word aangespreek teen die agtergrond van ’n reeks bisarre misdade waarin jong meisies grusaam vermink word voordat hulle sterf.

Jan Vermeulen publiseer sy eerste kortverhaal, Die Sneeuprins van Alaska, toe hy net veertien jaar oud is in 1976 in die destydse jeugtydskrif Patrys. Sy debuutroman van 1998, Die Laaste Dans, is ’n grensoorlogroman en haal die kortlys van die Eugene Marais-prys. Intussen rig hy ook stringe pryse in vir sy uitstekende jeugromans.

Boekbesonderhede


» read article

Sewe kinderboeke om na uit te sien in Februarie!

Z is vir Zackie 9: Die dieretuin
Jaco Jacobs
Illustreerder: Alex van Houwelingen

7+

Vandag is ’n spesiale dag. Zackie se klas gaan dieretuin toe! Hulle kan nie wag om die leeus, olifante, apies en ander diere te sien nie. Maar Anton gaan ook saam. Anton is ’n boelie. Hy hou vreeslik baie van spog. En hy gaan sy bes probeer om almal se dag te bederf.

Z is vir Zackie 10: Die vreemde fossiel
Jaco Jacobs

Illustreerder: Alex van Houwelingen
7+

Zackie en Vincent is op soek na fossiele! Dalk is daar ’n T-rex in die tuin begrawe? Of ’n trikeratops in die parkie? Of ’n stegosourus op die sypaadjie! Almal dink hulle is laf. Daar is tog nie fossiele in Granaatstraat nie. Maar dan ontdek hulle iets fantasties!

Hoezit! Die wonderwêreld van perde en ponies
Jaco Jacobs & Fanie Viljoen

Wat is die verskil tussen ’n perd en ’n ponie? Watter soort perd kan meer as ’n klein motor weeg? Waarvoor word verskillende soorte perde regoor die wêreld gebruik? Hoe moet jy jou perd of ponie versorg? Ontdek die wonderlike wêreld van perde en ponies met hierdie boek propvol prettige feite en aktiwiteite! Met 48 bladsye vol fassinerende feite, volkleurfoto’s en hope aktiwiteite, speletjies en kopkrappers waarmee jy die wonderwêreld van perde en ponies kan verken, is hierdie boek gewaarborg om jong feitevrate se tone te laat omkrul van lekkerkry! Maak van naderby kennis met van die indrukwekkendste perderasse, vind uit wat alles by ’n ryskool gebeur, ontmoet perde se verlangse familie in die diereryk, en ontdek ’n paar asemrowende perderekords! Die temas en aktiwiteite maak hierdie reeks boeke die perfekte hulpbron vir skoolprojekte en sal sorg vir ure se prettige vermaak by die huis. Sedert Hoezit! se bestaan in boekvorm, is daar al meer as 51 700 kopieë van hierdie reeks verkoop.

Reënboogrant Maats: Omnibus 1
Maritha Snyman
9+

Een van die gewildste Afrikaanse reekse is nou vir die eerste keer in ’n omnibus beskikbaar! Kom deel in die lekkerste tye van Shani en haar sussie Sunette se lewens – tydens die Reënboogrant-jare! In die Reënboogrant Maats-boeke is Shani-hulle op laerskool, en hulle beleef allerlei opwindende avonture – van ’n dief wat straatnommers steel, tot ’n droomrol in ’n balletkonsert.

Hierdie omnibus bevat die eerste drie titels uit dié gewilde reeks: Skelmstreke en kattekwaad, Alleen tuis en Die balletkonsert.

Die Reënboogrant-boeke, waarvan die eerste in 1995 verskyn het, was uiters gewild. Reënboogrant is destyds as ’n “boeksepie” beskryf. LAPA is trots om dit weer aan jong lesers beskikbaar te stel.

Kattekwaad
Susan Ongansie
lllustreerder: Linki Lutz

3+

Susan Ongansie is ’n splinternuwe skrywer!

Mietsie en haar boetie, Maans, is twee katjies. Hulle hou daarvan om met hulle bal op die sagte gras te speel. Maar toe Mietsie aan die slaap raak, besluit Maans om oor die muur te spring en iemand te gaan soek wat met hom wil speel.

Mietsie word wakker en ontdek haar boetie is skoonveld! Toe sy hom gaan soek, kry sy vir Mors en Jors, die twee grys straatkatte wat hou van stry en baklei! Sal die twee straatkatte haar kan help om haar boetie te kry – en uit die pad van die gevaarlike straatbrakke te bly?

Susan Ongansie is ’n grondslagfase-onderwyseres wat op Beaufort-Wes gebore en getoë is. “Die aard van my werk bied ’n lekker geleentheid vir skryf, aangesien ek graag stories, liedjies en gediggies skryf wat vir my leerders relevant is. Ek geniet die genot op hul gesiggies.”

Linki Lutz het aan die Universiteit van Stellenbosch gegradueer met ’n cum laude vir haar prakties in Skone Kunste. Piet Grobler is haar peetpa, so sy wou van ’n vroeë ouderdom reeds ’n loopbaan as illustreerder volg.

Kom ons praat oor waar babas vandaan kom
Robie H. Harris
Illustreerder: Michael Emberley
7+

Hierdie deernisvolle boek fokus op belangrike dinge waaroor kinders wonder: babas, voortplanting, liggame, gene, grootword, liefde, gesondheid en nog baie meer. Die inligting word op ’n eenvoudige manier oorgedra met humoristiese kommentaar van ’n baie nuuskierige voëltjie en ’n teësinnig by wat sou verkies om eerder nie oor dié dinge te praat nie! Vrolike volkleurstrokiesprentillustrasies help om die teks nog meer toeganklik te maak.

Seksvoorligtingboeke vir jonger kinders is in groot aanvraag en hierdie titel is al vir 15 jaar in Amerika en Engeland ’n topverkoper.

Robie H. Harris is ’n bekroonde skrywer wat veral bekend is as skrywer van kinderboeke oor seksualiteit. Sy het jare se ondervinding as onderwyser en as die direkteur van ’n náskoolprogram vir jong kinders. Sy woon saam met haar man in Boston, VSA. Michael Emberley skryf en illustreer al meer as dertig jaar lank kinderboeke. Hy woon in Ierland.

Aksieheld Austin: Nag van grille
Skrywer en illustreerder: Fanie Viljoen
9+

Ligte, kamera, aksie!

Ewald is nog op laerskool, maar sy naam is reeds op almal se lippe. G’n wonder nie – hy is immers die ster van die gewilde Aksieheld Austin-rolprente. In die flieks is hy ’n dapper held met vuiste soos kanonkoeëls wat skurke laat les opsê!

Die tweede fliek, Aksieheld Austin: Nag van grille, is pas voltooi, en Ewald kan nie wag vir die bekendstelling nie. Dit gaan by ’n ou fliekteater in die stad gehou word.
Die middag voor die vertoning gaan maak Ewald en sy beste vriend, Carlo, egter ’n draai by die grillerige ou fliekmuseum wat deel van die teater is. Kort voor lank is hulle vasgekeer in die museum – saam met ’n geheimsinnige figuur wat in die donker rondsluip …

As hulle wil ontsnap, sal Ewald hierdie keer net so dapper soos ’n REGTE aksieheld moet wees!

Dié asemrowende reeks avontuurverhale uit die pen van Fanie Viljoen is perfek vir jong lesers wat hou van stories propvol aksie en adrenalien!

Boekbesonderhede


» read article

Kompetisie! Drie gelukkige lesers kan ’n kopie van Jeanette Stals se Vermis wen

Vermis

Vermis is die tweede boek in ’n reeks oor Luna, ’n jong speursersant van Stellenbosch.

In hierdie verhaal word sy betrek by die ondersoek na ’n tienermeisie, Elodie, wat spoorloos uit ’n plaaslike gastehuis verdwyn het.

Die meisie se ouers het as jong getroudes na Engeland geëmigreer en nou is die pa weer hier vir werk. Die ma en dogter het met vakansie saamgekom en Elodie kry ook geleentheid om spesiale vioollesse by die universiteit by te woon.

Luna se bekommernis oor wat met die meisie gebeur het, laat haar dieper betrokke raak by die gesin en noop haar eindelik om meer te waag as wat haar bevelvoerders van haar sou verwag. Sy volg ’n verdagte motor, word oorrompel en self ontvoer.

In die bak van die motor vind sy die meisie, maar nou is albei gevangenes van ’n kartel wat handel dryf in jong vroue.

Luna moet elke greintjie inisiatief inspan en al haar kennis betreffende selfverdediging bymekaarskraap om van die ontvoerders af weg te kom en om vir Elodie uit die gemors te kry.
 

Wil jy graag ‘n kopie van Jeanette Stals se nuutste roman wen? Besoek ons Facebook-blad en gee vir ons een goeie rede waarom jy graag Vermis wil besit. Inskrywings sluit Woensdag 19 April.

Book details


» read article

Drie moet-lees Maart boeke

Lapa Uitgewers het ‘n besige Maart-maand agter die rug gehad. Buiten Hemelbesem se outobiografie, ‘n relaas van Wollie Wolmarans se beroep as forensiese patoloog, en Tannie Koelsoem en Tannie Flori se nuwe kookboek, het dié uitgewery boonop drie romans uitgebring wat by enige kranige leser sal aanklank vind.

Lees meer oor die boeke hier:

PelgrimshoopPelgrimshoop
Ronel Nel

Dit gebeur selde dat iemand ’n heel nuwe perspektief kan oopskryf op ’n ou tema. Ronel Nel kry dit reg – deels deur feite uit haar eie gesin se geskiedenis te gaan opdiep en ’n storie daarvan te maak. Die roman vertel van ’n skynbaar onskuldige vrou wat vir ’n skynbaar nors boer moet gaan skool hou. Die boer is ryk en sy perde doen goed.

Stadig maar seker ontdek die leser dat ons heldin nie so onskuldig is as wat ons dink nie, dat ons ryk boer nie om dowe neute homself eenkant hou nie – en bowenal dat die stukkie paradys wat hy probeer skep, nie deur slange nie, maar wel rassiste bedreig word.

’n Mens sou hierdie roman kon beskryf as relevant vir ’n wêreld waarin “die ander” deesdae weer openlik aangeval en verkleineer mag word. Dit is. Tog, diep in die wese van hierdie storie klop twee harte wat desperaat is om menslikheid te vind. Lees maar. Geniét die storie; daar is baie om te geniet. Ten spyte van die donker onderwerp, breek die hoop deur. Wanneer die leser dan boonop – teen die einde – besef hoe hierdie storie die skrywer se eie lewe gevorm het, wil jy ’n traan van lekkerkry wegpink. Maar ervaar dit self.

Die ander vs. die ons: Elias Bart, die ryk boer vir wie Hannah moet klasgee, doen moeite om na ander om te sien. Vliet Vorster, voorste boer en burgemeester, wat elke Saterdagaand Die Oog leegdrink en dan Sondag voor in die kerkgestoeltes sit, pes die “bontspul” op Elias Bart se plaas. Moeilikheid broei, en breek uit. Die boek loop deur een baie belangrike jaar in ons geskiedenis, 1956, ondersoek die instelling van ‘petty politics’ en betrek onder meer die vrouemars na die Uniegeboue, wat ons steeds elke jaar gedenk op die 9de Augustus. Dit vertel egter ook ’n stukkie onbekende geskiedenis – en is gebaseer op werklike gebeure.

DoodsroeperDoodsroeper
Rika Cloete

Dit is Februarie, 1861.

’n Groepie trekboere maak hulle gereed vir die jaarlikse migrasie van die springbokke – een van die merkwaardigste en bekendste tonele in die Suid-Afrikaanse geskiedenis. Hulle staning is naby die Gamagararivier in die Kalahari. Die spanning bou op, want hulle verkenners vertel dat die bokke op pad is.

Dan is daar ’n lyk.

Die man is wreed vermoor en die lyk is daarna verder vermink. Die dooie lê in Stilbos – ’n misterieuse plek sonder voëls en die skuilplek van die Doodsroeper, ’n onaardse wese wat uitroep voordat iemand sterf. Soois Bruwer, ’n verloopte wetsman, word versoek om ondersoek in te stel. Soois het rede gehad om homself eenkant te hou, nou moet hy meer spraaksaam wees en só besef hy: Dié groepe mense met wie hy saamtrek, het byna almal iets om weg te steek.
 
 
 
Net toe Soois dink hy is op die regte spoor, roep die Doodsroeper weer en sit hy met ’n tweede lyk op hande. Nou moet hy alles inspan om die moordenaar vas te trek, want dit wil voorkom asof daar binnekort nog dooies sal wees.

Rika Cloete se obsessie is misdaadfiksie, as dit boonop teen ’n geskiedkundige agtergrond afspeel, soveel te beter. Reeksmoordenaars, passiemoorde, gifmoorde, geestesversteurings – dit is alles al van toentertyd af deel van die mens se bestaan, so ook die vraag om geregtigheid, die drang na die uitlewering van die skuldige en die onwrikbare geloof dat die goeie uiteindelik die bose sal oorwin; dit is alles gewortel in ons menswees. Juis dít gee ons hoop vir die toekoms; daarom is dit noodsaaklik om daaroor te skryf. In 2002 is Cloete se debuutbundel eensaamigheid gepubliseer en in 2004 die avontuurromanse Die Oog van Isis. ’n Hele klompie tydskrifverhale het ook al uit haar pen verskyn. Doodsroeper is Rika se eerste spanningsroman.

SmeulSmeul: Drie Vroue, Een Kombuis
Riana Scheepers, Marietjie Koekemoer en Leonie Scholtz

Drie uiteenlopende karakters, drie vriendinne: ’n Bemarker, ’n radioloog en ’n skrywer; hulle is so verskillend soos komyn en kaneel, maar al drie is wêreldswerwers, kunstenaars en passievol verknog aan die eeu-oue wonderwerk van kosmaak. Hulle deel ’n liefde vir die kombuis, salf mekaar se wonde, drink wyn, luister magiese musiek en vier die lewe. In die kombuis bruis hul vriendskap, of juis soms nié. Die een is morsig met meel en heeltemal te oordadig as dit kom by rissies en peperkorrels, die ander meet alle mates presies af en swaai die houtlepel-septer oor die botter én die bobotie.

Eeu-oue familieresepte en hartsgeheime word gedeel, maar hulle het ’n neus vir nuwe neigings in die kulinêre wêreld, dié word beproef, getoets en hul eie gemaak. Diepnag, tussen sielsgenote, word nuwe geregte word geskep, want dit is dán wanneer die kokke dans. Hierdie drie vroue kuier en kook van die Weskus tot in die Karoo, in die woud en ook die stad; hulle kook oor die aardbol heen.
 

Die resultaat van hierdie unieke vriendskap, en die geregte wat daaruit voortspruit, kan net smeul.

Smeul bevat ou bekende resepte, opgekikker in ’n nuwe moderne baadjie, maar ook ’n hele paar nuwe smake en interessante kombinasies uit die drie formidabele vroue se kombuise. Daar is 110 resepte en in vier afdelings.

Iets oor elke afdeling
Weergalose Weskus: Swartmossels met lekker bros brood; braaisnoek op die kole; smoorsnoek én viskoekies; calamari-, kiwivrug-en-kruisementslaai; oondpatat met suurroom,
pikantrissies en veldkool.
Karooland, hartland: waterblommetjiesop; bruin wildvleissop met jenewerbessies en jenewer; pampoentert met lemoensjokolade; bolmakiesiepastei; Marietjie se karoowors;
ontbeende, gevulde skaapkop en biltongpatee.
Diep, diep in die donker woud: botterskorsie-en-soetpatatsop met grondboontjiebotter; sampioenrisotto; ertjiemousse met kruisement; brandnetelbredie; malva-gemmerpoeding met appels; rolkoekpoeding met pere, witsjokolade en nastergalkaaskoek.
Sprokie vir ’n stadskind: beesstertsop met ’n Thaise kinkel; Marokkaanse lensies; artisjokke; oondgebakte kwartels; hupse hamburgers op roosterkoek; frikkadelle met plomp tamatiepuree op Afrika-polenta; kantkoekies en mooikoek.

Book details


» read article

Koeëlreën: Wapens, bloedspatsels en wonde – Wollie Wolmarans se sake bewys dat feite soms meer bisar is as fiksie…

Wollie Wolmarans is een van Suid-Afrika se bekendste forensiese deskundiges. Hy is al geroep in meer as 800 hofsake in Suid-Afrika, en oorsee. Een van sy mees bekende sake was Oscar Pistorius s’n; daarna het almal ’n opinie gehad oor spatmerke.

Gooi hierdie ongelooflike kennis saam met Japie Bogaards se vermoë om ’n spannende storie te vertel, dan het jy ’n feiteboek wat soos ’n riller lees.

Vir 240 bladsye vertel hierdie twee jou van ware sake, beide ter plaatse en in ander lande. So, al lesende, word ons al hoe meer vertroud met die studie van projektiele in vlug, die uitkenning van vuurwapens, hulle reikafstand en afvuurtempo, die snelheid van die projektiel, die merke wat op afgevuurde doppies en koeëls gelaat word, die aard van die wonde wat hulle veroorsaak, ja – ook bloedspatselpatrone en die chemiese reste wat koeëls laat op diegene wat daarmee in kontak was, as ook die versameling en berekening van data.

Koeëlreën is ’n fassinerende boek met sake wat tot die 1800s terugdateer.

Die moord op John F Kennedy word betrek, so ook die skrikbewind van die Beltway Snipers wat in 2002 talle mense sonder enige patroon afgemaai het.

Soos die boek vorder, leer die leser al hoe meer.

Verskeie Suid-Afrikaanse sake word betrek, ook die van Pistorius.

Van die interessantste gevalle is egter dié wat nie noodwendig die poniepers haal nie.

Een daarvan is Jamie Verhoef se saak. Die seun se lyk word in sy kamer op ’n afgeleë plaas naby Beaufort-Wes aangetref. Hy lê op sy jaggeweer, sy kop is vergruis. Was dit ’n ongeluk of selfdood? Die antwoord is belangrik, want daar is ’n polis, met ’n selfdoodklousule, van ’n miljoen rand op die spel. Meer nog: Daar is ’n gesin wat antwoorde soek.

Hoe haal regerings hulle teenstanders uit? Al gehoor van spioene en giftige sambrele? Koop die boek, sulke goed gebeur nie net in James Bond-films nie. Feite is soms veel meer bisar as fiksie.

Koeëlreën

Book details


» read article

Woestynroos: Tweede boek in Vita du Preez se reeks, Die Vinkel en Koljander-vroue, nou beskikbaar

WoestynroosWoestynroos deur Vita du Preez is nou beskikbaar op LAPA se rakke:

Op die oog af het Kato Klinge alles: Sy is aantreklik, intelligent en baie suksesvol in haar beroep as ingenieur, maar selfs ’n suksesgedrewe perfeksionis het moederlike instinkte. Kato wil ’n baba hê, maar daar is nie ’n spesiale man in haar lewe nie.

Stef Steenkamp, met wie Kato ’n jarelange platoniese vriendskap het, kom met ’n plan vorendag. Daar is reeds ’n baie spesiale band tussen hulle, want Stef se ma is tydens sy geboorte oorlede en Bea Klinge het Stef saam met haar eie babadogter, Kato, aan haar bors geneem. Volgens Stef is dit die ideale oplossing dat hulle saam ’n baba sal hê en die verantwoordelikheid vir die baba se opvoeding deel. Hulle kind sal in ’n liefdevolle, standvastige omgewing grootword, want niks gaan ooit hulle vriendskapsverhouding vertroebel nie. Hulle kind sal ook nooit die trauma van ’n egskeiding beleef nie, want hulle gaan nooit die romantiese liefde en die trouding doen nie.

Stef kon Kato, wat alles volgens die boek doen, nog altyd ’n gat in die kop praat en haar oortuig om goed te doen waaraan sy nooit eens in haar stoutste drome sou dink nie.

Kato stem in.

Om hierdie baba te verwek, moet Kato egter net so hard werk soos vir enige iets anders wat sy al in die lewe bereik het.

Stef hou van vroue, maar hy verkies T20-romanses met girls wat nie ’n man se vlerke wil knip nie. Kan so ’n man ’n kind verwek en steeds net platoniese vriende bly met die ma van sy kind?

Woestynroos is die tweede boek in ’n vierluik wat begin met Solitaire. Die reeks staan bekend as Die Vinkel & Koljander-vroue.

Oor die outeur

Vita du Preez se eerste romanse As sterre blom het in 1996 verskyn terwyl sy voltyds as argivaris by die WNNR gewerk het. Daarna het verskeie titels uit haar pen die lig gesien. ’n Persoonlike gunsteling was Skuiling van die hart, ’n historiese roman wat tydens die Boereoorlog afspeel. ’n Man vir Mia was ’n finalis vir die LAPA-Liefdesromansetoekenning 2005/2006. Nadat sy in 2002 Kaap toe verhuis het, het sy vryskutvertaalwerk begin doen, wat later ’n heeltydse werk geword het. Sy het meer as sestig Mills & Boon en Harlequin Intrigue-titels vertaal. Ná tien jaar in die bedryf het sy besluit genoeg is oorgenoeg en weer voltyds op haar skryfwerk begin fokus. Sy was lus vir ’n nuwe uitdaging en het besluit om ’n ander genre – liefdesromans – aan te pak. Vita kry haar inspirasie uit die alledaagse, waar goeie en slegte goed met mense gebeur, en wil karakters skep met wie moderne Afrikaanse vroue kan identifiseer. Gelukkige eindes, glo sy, kan ons almal beskore wees as ons ons lewensvreugde en humorsin behou. Deesdae woon Vita saam met haar man Riaan du Plessis in die Strand en wanneer sy nie skryf nie, maak sy tuin, lees en kuier saam met vriende.

Boekbesonderhede


» read article