Sunday Times Books LIVE Community Sign up

Login to Sunday Times Books LIVE

Forgotten password?

Forgotten your password?

Enter your username or email address and we'll send you reset instructions

Sunday Times Books LIVE

LAPA Uitgewers

@ Sunday Times Books LIVE

Archive for the ‘Afrikaans’ Category

Sluit aan by Lapa se RomanzaKlub – jy verdien dit

By LAPA Uitgewers gee ons maandeliks vier lekkerlees-liefdesverhale uit. Dit verskyn onder die reeksnaam, Romanza.

Het jy geweet?
· Wanneer jy ’n romanse lees, veroorsaak dit ’n chemiese reaksie in jou brein wat jou goed laat voel.
· Dit verlig stres op ’n natuurlike manier.
· Romanzas voer jou weg na ’n plek waar mans ridders is en liefde heel maak.

Bederf jouself met ons liefdesverhale.

Jy verdien dit.

Sluit aan by RomanzaKlub teen R115,00 per maand en ontvang as lid die volgende voordele:

- Ontvang twee Romanzas elke maand vir slegs R115,00

- Bestel jou derde en vierde Romanza vir slegs R45,00 elk

- Jy kry 50% afslag op alle SuperRomanzas

- Ontvang ’n gratis ses-maande subskripsie tot rooi rose

- Jy kry 30% afslag op alle LAPA-boeke (dit sluit Romanza, afgemerkte boeke of enige ander spesiale aanbiedinge uit). Hierdie bestellings kan telefonies geplaas word by 012 401 0700 of via epos by lidav@lapa.co.za. *Slegs vir bestellings, nie vir aansluiting by die klub nie

- Die liefdesverhaal, Droomman, word eksklusief aan nuwe lede gestuur en is geteken deur die skrywer, Magdaleen Walters

Klik hier vir meer inligting.


» read article

Vier romanzas vir die winter

Bernadine en die babawagter
Arien Lubbe

Bernadine stel iemand aan om na haar driejarige seuntjie te kyk. Miké se CV beïndruk haar die meeste so sy kry die pos. Maar dan blyk “Miké” eintlik Michael te wees – ’n onbeskryflik aantreklike en baie manlike ingenieur!
 
 
 
 
 
 
Alles is perfek
Dina Botha

Die weduwee en sterrekundige, doktor Emma Holbrook, se toekomsplanne sluit nie ’n babadogtertjie in nie. Sy wil vir NASA werk en gaan haar kind laat aanneem. Maar die aantreklike dokter Simon Krynauw, wat haar dogtertjie wil aanneem maak haar hart baie deurmekaar.
 
 
 
 
 
 
Die dokter se rare fobie
Trudy Reinhardt

Roseanne se ses-maande-verblyf op die pragtige St Francisbaai word deur haar tydelike kollega, Sean Byrne, ontsier. Sy diagnoseer hom met ’n rare vrees vir velkontak. Maar die vraag is, het Sean werklik ’n vrees vir kontak of hou sy fobie eerder verband met blondines, waarvan Roseanne een is?
 
 
 
 
 
 
Die paartjieknoper
Ida Bester

Annelle is ’n paartjieknoper, maar sy wil nie liefde vir haarself vind nie. Toe sy egter in Christiaan Verwey se oë kyk, is sy nie meer so seker sy wil Kupido se pyl ontwyk nie.

 
 
 
 
 
 

Boekbesonderhede


» read article

“Soet kinders maak nie goeie stories nie” – Fanie Viljoen gesels oor sy jeugromans

Fanie Viljoen het destyds kritici, lesers, ouers, en onderwysers aan die gons gehad oor sy debuutroman BreinBliksem. Sedertien het Fanie uitgebrei na kinderboeke, en romans vir jonger tiener lesers. Hier gesels hy oor die noodsaaklikheid van kwessies soos homoseksualiteit in skole bespreek, die rol wat musiek in sy boeke speel, die subtiele gevare van tegnologie, en faktore wat daartoe lei dat mense gewelddadig optreee.

Buiten jou jeugverhale, skryf jy ook kinderboeke. Hoe verskil die uitdagings wat jy met die skryf van die twee afsonderlike genres ervaar?

Die ontwikkelingsvlak van kinders verskil geweldig van jaar na jaar. ’n Mens moet dus baie versigtig wees vir die tipe stories wat jy vertel en hoe jy dit vertel. Met jeugverhale kan jy meer waag wat temas betref, veral vir ouer tieners.

Die risiko’s wat aan ons maklike/oombliklike toegang tot die internet geheg word, word in jou boeke ondersoek. Brei bietjie uit hieroor?

Tegnologie is baie belangrik vir jongmense, en hulle boeke moet dit weerspieël. Ek hou daarvan om soms die spanning op te jaag as die tegnologie nie werk nie, byvoorbeeld as ’n selfoonbattery pap is wanneer jy hulp wil ontbied. My boeke waarsku ook subtiel teen die gevare van tegnologie, soos die gebruik van sekere apps of kuberkrakery.

Uit handel oor ’n tienerseun wat worstel met sy seksualiteit. Wat is jou opinie oor hoe homoseksualiteit deur Afrikaanse gemeenskappe ontvang word? Dink jy daar word genoeg opbouende, deurdenkte gesprekke daaroor gevoer? Word daar genoeg daaroor geskryf in jeugromans?

Die aanvaarding van homoseksualitiet verskil grootliks in ons land. By sommige skole het die kinders nie ’n probleem daarmee nie, maar by ander skole kan ek sien hoe die atmosfeer dadelik verander as die onderwerp opkom. Daar was al ook ’n skool wat gevra het dat ek nie oor Uit moet praat nie. Dit is juis daardie skole wat dit nodig het. Daar moet gepraat word, want in elke skool is daar ’n paar kinders vir wie die boek bedoel is. Die tieners moet weet hulle staan nie alleen nie. Ons jeugromans begin al hoe meer in die tema delf. Marion Erskine se onlangse jeugroman Vlerke vir Almal vir almal spreek dit ook as subtema aan.

Uit

Een hoofstuk in Pleisters vir die Dooies se titel heet ‘Ultrageweld’; hierdie is ‘n direkte verwysing na die hoofkarakter in Anthony Burgess se Clockwork Orange, Alex, en dié se droogs se gunsteling tydverdryf (“ultra violence”). Die ongure karakters wat die protagonis raakloop herinner ook aan Alex en sy droogs. Beide BreinBliksem en Pleisters vir die Dooies bevat tonele van ultrageweld. Hoe gaan jy teweeg om bloeddorstige tonele te skryf, en wat dink jy ‘veroorsaak’ gewelddadige gedrag in ’n mens? (Die protagonis in PVDD skryf sy geweld-drange aan rekenaarspeletjies toe, maar tog…)

Ek laat my deur my skrywersinstink en die karakters lei wanneer ek so ’n toneel sou skryf. Dit moet getrou wees aan die storie en pas by die karakter se motivering. Daar is verskeie kriminologiese teorieë vir geweld en misdaad. Om net rekenaarspeletjies die skuld te gee, is simplisties. Frustrasie, ouers se onbetrokkenheid, boeliery en toegang tot wapens is van die redes.

Breinbliksem
Pleisters vir die dooies

Verwysings na musiek en musikante verskyn deurlopend in jou romans (van Korn in BreinBliksem tot Foster the People en Leonard Cohen in Pleisters vir die Dooies en selfs jou eie skepping, Koelkop, in Spring). Wat beteken musiek vir jou, en watter rol speel musiek in tieners se lewens?

Musiek word die klankbaan van ’n mens se lewe. Elke jeugverhaal wat ek skryf het ook ’n klankbaan. Dit help my om in die karakters se koppe te klim. Vir Pleisters vir die Dooies het ek byvoorbeeld herhaaldelik na Nick Cave se “Mercy Seat” geluister omdat dit byna soos ’n mantra is.

Swendelaars en groepsdruk steek ook gereeld kop uit in jou boeke. Om watter rede skryf jy oor tieners/jong volwassenes se begeerte om deur hulle portuurgroep en/of ouer, cooler, meer ervare mense aanvaar te word?

Die behoefte om aanvaar te word is steeds ’n kwessie vir die meeste tieners. Dis deel van die grootwordproses, ons wil iewers behoort, selfs al is dit by die groep kinders teen wie jou ouers jou gewaarsku het. Om dan te lees hoe daardie behoefte jou in die moeilikheid laat beland, sorg vir ’n lekkerleesboek. Soet kinders maak nie goeie stories nie, of altans nie die stories wat ek wil lees nie.

Boekbesonderhede


» read article

Twee nuwe titels in Jaco Jacobs se Z is vir Zackie-reeks tref die rakke

Z is vir Zackie 7: Die Woeste Toertjie
Jaco Jacobs
Illustreerder: Alex van Houwelingen

Zackie en Vincent is baie opgewonde! Hulle gaan aan ’n fotokompetisie deelneem. Vincent het sy pa se kamera geleen. Hulle moet ’n mooi foto neem. Die beste foto’s kan groot pryse wen!

Om ’n goeie foto te neem is glad nie so maklik as wat dit lyk nie en Zackie besluit om sy skaatsplank te gaan haal vir die beste aksiefoto ooit! Maar Anton, die boelie, het ander planne …
 
 
 
 
 
Z is vir Zackie 8: Die Slymerige Slakke
Jaco Jacobs
Illustreerder: Alex van Houwelingen

Mevrou Langenhoven se tuin is vol slakke. Groot, slymerige slakke! Zackie en Vincent besluit om te help. Hulle gaan die slakke vang. Dit is groot pret! Boonop kry hulle ’n beloning. Mevrou Langenhoven bak vir hulle lekker koekies!

Maar Anton, die boelie, wil al die koekies eet …
 
 
 
 
 
 
 
Boekbesonderhede


» read article

Kook saam Kaaps haal kortlys vir Nielsen Booksellers Choice Award 2017

LAPA en die ATKV, in samewerking met RSG, is trots op die blitsverkoper Kook saam Kaaps deur tannie Koelsoem Kamalie en tannie Flori Schrikker. Die boek het pas die kortlys gehaal van die Nielsen Booksellers Choice Award vir 2017.

In 2016 wen Kook saam Kaaps ’n WoordTROfee as die beste verkoper in die lewenstylkategorie tydens die US Woordfees.

Later in 2016 kondig die jurie van die Gourmand World Cookbook Awards aan dat Kook saam Kaaps, deur Koelsoem Kamalie en Flori Schrikker, die Nasionale Wenner is in die kategorie Beste Plaaslike Cuisine. Edouard Cointreau, die president van die jurie en die stigter van die Gourmand World Cookbook Awards, sê in sy commendatio: “This is a book with magic, bringing back local recipes which are family secrets from grannies in the Cape Town area.”

Hulle TV-reeks, Flori en Koelsoem se kosse wat op Via uitgesaai word, is in 2017 bekroon met ’n AKTV-Mediaveertjie. Die tweede reeks begin binnekort.

 
Boekbesonderhede


» read article

Twee nuwe titels in Lize Roux se gewilde Stalmaats-reeks

Stalmaats 19: Pretrit
Lize Roux

Die skoolvakansie is om die draai.

Anri is baie opgewonde toe sy hoor haar beste vriendin van haar vorige ryskool kom kuier. Nadine is ook lief vir perdry – en Anri kan nie wag om haar aan Megan en Karen voor te stel nie.

Hulle gaan die vakansie hope pret by die ryskool hê, met ekstra rylesse en ’n spesiale Paaseier-soektog vir die Peace Shelter se kinders!

Maar dit lyk of Nadine ander planne het, en Anri se vriende by die ryskool is nie so beïndruk daarmee nie …

Dit is boek nommer 19 in hierdie baie gewilde perdereeks, wat handel oor Anri en haar maats se avonture by die Dagbreek-ryskool.


Stalmaats 20: Perdediewe
Lize Roux

Anri kan nie wag nie vir die langnaweek wat voorlê nie! Sy en haar gesin gaan lekker in die Kaap kuier. Hulle gaan met die kabelkar tot op Tafelberg ry, die akwarium besoek en hope pret hê.

Boonop stem haar ouers in dat Jacques mag saamkom. Dit beteken hy kan self gaan kyk hoe dit met sy perd, Thunder, en haar vulletjie, Storm, gaan.

Maar dan loop die ryskool waar die twee perde bly, onverwags onder gewetenlose skurke deur – en kort voor lank is Anri-hulle in groot gevaar.

Dit is boek nommer 20 in hierdie baie gewilde perdereeks, wat handel oor Anri en haar maats se avonture by die Dagbreek-ryskool.

Boekbesonderhede


» read article

“Hendrik weet hy het nie die seun geskiet nie, maar hoe bewys hy dit?” Heiliger is ’n aangrypende regsdrama deur Dibi Breytenbach

Hendrik skiet uiteindelik ’n sluwe rondloperhond. Die eerste koeël mis rakelings, maar die tweede is sekuur. Nou is die oud-soldaat in ’n goeie bui. Dit is byna Kersfees en dinge tussen hom en Amalia wil-wil lyk of dit kan uitwerk.

Toe gebeur dit: Die plaaslike speurder, Buthelezi, daag op en slaan Hendrik in boeie. Die klag? Sy buurman se seun is dood en daardie opslagkoeël word verdink.

Dadelik word hierdie insident ’n rasse-voorval, want die seun is swart. Die gemeenskap is woedend en die onbevoegde blanke speurder wil wys dat hy nie ’n wit man sal laat wegkom met moord nie.

Hendrik weet hy het die seun nie geskiet nie, maar hoe bewys hy dit?

Die teks is briljant, want so gereeld gebeur dit dat stinkryk mense wegstap van ’n moordsaak op grond van tegniese punte. Die publiek voel dan verraai. Nou gooi Breytenbach die leser in die diepkant in, want ons het simpatie met Hendrik, maar die redes waarom die reg nou skynbaar onreg pleeg teenoor hom, is presies dieselfde wat ons as gewone sterflinge vra wanneer tegniese detail in hofsake ter sprake kom.

Saam met Hendrik beleef ons magteloosheid in die stinkende tronk- en hofselle terwyl die regslui en die polisie kibbel.

Breytenbach is ’n regsgeleerde en met hierdie boek sleep sy die leser saam met haar. Dit is ’n naelbyter, want natuurlik wil almal weet hoe die seun gesterf het. Gaan Hendrik oud word in die tronk?

Stukkie vir stukkie word die gebeure aanmekaar gelas en die reg se tentakels word beleef soos nog nooit te vore in Afrikaans nie.

Dibi Breytenbach se eerste twee boeke was goed. Hierdie een plaas haar onder die voorste krimiskrywers in ons land. Heiliger sal ewe goed verstaan word in plekke soos die VSA waar die onreg van die regsproses dikwels afhang van ’n mens se geld, aldan nie.

Boekbesonderhede


» read article

Vier romanza titels vir die winter

Liefde vir ’n vlinder
Didi Potgieter

Emma Parker vlug van haar weelderige lewe in New York om as huishoudster vir Pieter Joubert op sy Bosveldplaas te werk. Hy het in die verlede ’n groot bloutjie met ’n rykmansdogter geloop en gaan Emma ten alle koste vermy …
 
 
 
Romanse in rock
Marilé Cloete

Beth kan haar “Groot Liefde” – Bruce Springsteen – se konsert in Noorweë bywoon. Sy moet net eers die vlug soontoe met die aantreklike Etienne Benade aan haar sy oorleef. En nie op hom verlief raak nie, want hy het ’n meisie.
 
 
 
Liefde in die KarooLiefde in die Karoo
Rika du Plessis

Karin verloor haar loopbaan, balletskool en kêrel na ’n ongeluk. Vir ’n nuwe begin trek sy na die Karoo en ontmoet Jaco – die man wat sy verantwoordelik hou vir die ongeluk. Omstandighede gooi hulle keer op keer saam en stadig vind hulle harte mekaar.
 
 
 
Die plaasvervanger
Die plaasvervanger
Magda Schmidt

Linda se suster vra haar om ’n kind by haar man te kry om haar huwelik te red. ’n Verbode liefde vir haar swaer ontwaak in haar hart, terwyl haar eie held geen passie in haar wakker maak nie.

 
 

Boekbesonderhede


» read article

Elsa Winckler se volgende omnibus is hier

Hoe diep die liefde lê
Elsa Winckler

Elsa Winckler se vorige omnibus, Liefde langs die Eersterivier het lesers laat vra vir nog. LAPA het geluister. Hierdie omnibus bestaan weer uit drie van Elsa Winckler se vorige Romanzas: Waar liefde lê, Want daar’s skoenlappers en Heldergeel dag.

Waar liefde lê: In Lana se kort joernalistieke loopbaan vertrou die redakteur haar net met berigte oor celebs, tot sy die dag ’n kollega moet uithelp toe ’n omgewingskundige ’n lesing gee.

Nie dat dit haar opgewonde het nie, want sy wil oor politiek verslag doen, nie oor “groen aktiviste wat bome loop en omhels” nie.

Niemand het haar egter gesê hierdie groen aktivis is so lenig en het sulke blou oë nie; ook nie dat sy passie veel intiemer kan word nie. Hoe klink ’n klimekspedisie Kilimandjaro toe saam met ’n man wat nie net bome omhels nie?

Die probleem is egter: niemand het vir hóm gesê Lana het ’n doodse vrees vir berge nie.

Want daar’s skoenlappers: Gemma is ’n mediese dokter en Nick ’n oorlogsfotograaf.

Boonop is Gemma se broer met Nick se suster getroud. Hierdie twee aangetroude familielede het die talent om mekaar verkeerd op te vryf, want kort-kort is daar ’n uitval.

Wat hierdie situasie ietwat eienaardig maak, is dat hulle nie hulle hande van mekaar kan afhou nie en gedurig in mekaar se gedagtes is.

Toe Nick saam met ander oorlogsfotograwe in Libië gevange geneem word en Gemma terselfdertyd siek word in Haïti, is dit asof ’n onsigbare mag hulle na mekaar toe aantrek.

Heldergeel dag: Vir ’n wynmaker soos Cara is dit sommer ’n helderblou dag wanneer iets goeds gebeur.

En ’n heldergeel dag wanneer daar nou regtig iets wonderliks gebeur.

Met haar vriendin se broer, Henry, in die omgewing kan die geelste dag egter vaal word. In al die jare sedert sy hom leer ken het, kon hulle mekaar nie verdra nie. Of dink hulle net so omdat hulle eintlik te veel van mekaar hou? Die man se lang lys verskonings help Cara egter net mooi niks!

Boekbesonderhede


» read article

Vyf kinder- en jeugboeke om vandeesmaand te verslind

Die rooikop, die leeu en die handgranaat
Annelie Ferreira

Adele was nog altyd versot op kuns. Dit was haar díng. Maar sedert die begin van die jaar kry sy skielik vrot punte. Dalk hou die nuwe kunsjuffrou nie van haar nie. Hoekom sukkel sy so met haar selfportret vir die volgende klasprojek? Is dit omdat sy haar bos rooi hare en kurwes so verwens?

Die afgelope tyd voel dit buitendien of ’n groot hand haar wêreld gevat en geskud het. Soos daai ou bordspeletjies wat hulle kleintyd saamgevat het op vakansies. Iemand stamp per ongeluk net liggies aan die Slangetjies-en-Leertjies en al die knope en dobbelsteentjies is deurmekaar, en niemand het meer ’n cooking clue of hulle naby die einde of die begin is nie.

En dit alles begin die middag toe sy van die skool af stap en ’n leeu in hulle tuin ontdek …

Annelie Ferreira het al twee maal die Sanlamprys vir Jeuglektuur gewen. Sy skroom nie om moeilike onderwerpe aan te raak nie. Hierdie nuwe jeugverhaal uit haar pen is ’n holderstebolder wipwarit vol humor, romanse, aksie en avontuur.

Dromers
Fanie Viljoen

Dans is Byron Carelse se hele lewe. Dit is sy energie, sy passie, sy geluk … sy vonk. Wanneer die ritme sy lyf beetkry, vergeet hy van die probleme wat by die huis op hom wag.
Sy beste vriendin, Tasha, sê altyd hy moenie toelaat dat ander mense sy vonk steel nie. Maar sy weet nie van die dinge wat by sy huis gebeur nie. En dalk is dit beter so. Wat sal sy van hom dink?

Op ’n dag sien iemand Byron se talent raak. Hy kry saam met ’n groepie ander township-kinders die kans om deel te wees van ’n glansryke vertoning by die kunstefees. Die kans om groot drome te droom … groter as die township waar hy bly. Maar wat doen jy as die lewe jou drome probeer steel?

Hierdie splinternuwe jeugroman uit die pen van Fanie Viljoen is in eenvoudige, maklik verstaanbare taal geskryf – perfek vir trae lesers of lesers wie se tweede of derde taal Afrikaans is.


Hoezit 12: Die wonderwêreld van vreemde diere

Waar sal jy vlieënde paddas kry?

Watter soort bok het tande soos Dracula?

Watter diertjie kan kilometers onder die see en selfs in die buitenste ruimte oorleef?

Waar sal jy ’n verkleurmannetjie kry wat so groot soos ’n kat is?

Ontdek van die vreemdste diere op ons planeet met hierdie boek propvol prettige feite en aktiwiteite! Met 48 bladsye vol prettige feite, volkleurfoto’s en hope aktiwiteite, speletjies en kopkrappers waarmee jy die wonderwêreld van vreemde diere kan verken, is hierdie boek gewaarborg om jong feitevrate se tone te laat omkrul van lekkerkry!

Maak van naderby kennis met vampiervlermuise, ietermago’s en tapirs – en verstom jou aan van die eienaardigste diere wat jy ooit gesien het! Die temas en aktiwiteite maak hierdie reeks boeke die perfekte hulpbron vir skoolprojekte en sal sorg vir ure se prettige vermaak by die huis.

Lana en Rakker 3: Speeltyd vir Rakker
Holly Webb

Die skool se sportdag is om die draai en Lana is bekommerd sy gaan heel laaste in elke enkele item kom. Maar dan kry sy ’n briljante idee: Sy kan saam met Rakker begin oefen om lekker fiks te word!
 
 
 
 
 
 
 
 
 
 

Lana en Rakker 4: Die pajamapartytjie

Holly Webb

Dit is amper Lana se verjaardag, en sy beplan ’n pajamapartytjie. Maar dan erken Lana se nuwe maat, Lisa, dat sy bang is vir honde. En in Lana-hulle se huis is daar geen wegkomkans van die spelerige Rakker nie.
 
 
 
 
 
 
 
 
Boekbesonderhede


» read article