Sunday Times Books LIVE Community Sign up

Login to Sunday Times Books LIVE

Forgotten password?

Forgotten your password?

Enter your username or email address and we'll send you reset instructions

Sunday Times Books LIVE

LAPA Uitgewers

@ Sunday Times Books LIVE

Leeskringseminaar: Chanette Paul stel haar Maanschijnbaai-tweeluik bekend (Plus: Video)

Chanette Paul

 
Maanschijnbaai: Jo en SueNá die laaste boek in haar Gys Niemand-spanningsreeks verlede jaar verskyn het, het Chanette Paul besluit om ‘n ligte romanse te skryf, maar haar karakters het ander planne gehad…

Só het Paul Dinsdagoggend gesê tydens ‘n gesprek oor haar Maanschijnbaai-tweeluik by LAPA se Leeskringseminaar 2012 wat by SASNEV in Pinelands gehou is. Aanvanklik het die karakter Jo, haar (buite-egtelike) dogter Jeannie en haar ma Nan hulle by die skrywer aangemeld.

“Een aand staan ek toe in die kombuis en uie skil en skielik sien ek haar voor my…Sue!” Sue is die rokende, vloekende tante van Jo en suster van Nan. “En ek dink, dit kan mos nie, want ‘n karakter in ‘n romanse mag nie rook en die f-woord gebruik nie!”

Hoe meer Paul die karakter se mond probeer snoer het, hoe meer het sy uitgehaak. “Ek het toe maar besluit om haar te laat begaan en my voorgeneem om, as ek klaar geskryf is, die find and replace-funksie in Word te gebruik om al haar f-woorde te vervang.”

Dit was egter nie net die karakter wat nie in die beeld van ‘n tipiese romanseheldin wou pas nie, die hele storie het sommer ‘n ander rigting ingeslaan.

Chanette Paul In Maanschijnbaai: Jo en Sue, die eerste boek in die tweeluik wat pas by LAPA-uitgewers verskyn het, erf die vier “wilde” Calitz-vroue (Jo, Sue, Nan en Jeannie) die eksentrieke Casper Calitz se se pienk Cadillac en bouvallige turkoois huis in Maanschijnbaai. Hulle besluit om in die klein dorpie te bly om die huis op te knap en omdat hulle elkeen ‘n verlede het waarvan hulle wil ontsnap. Sommige van die Maanschijnbaaiers is egter nie tevrede met die “Calitz-slette” wat hulle op die dorp kom tuismaak nie.

Die kern van die boek is vroue wat as sogenaamde “slette” veroordeel word. “Ek het al baie keer gesprekke afgeluister – skrywers doen dit baie – waar daar oor ‘die wilde vroue van so-en-so-dorp’ geskinder is.” In die Maanschijnbaai-tweeluik ondersoek Paul waarom hierdie vroue is soos hulle is en waarom mense voel hulle het die reg het om dié vroue te veroordeel.

“Ek was al amper klaar met die boek en ek het nog steeds nie geweet met watter genre ek nou eintlik besig is nie,” vertel Paul. Toe tref dit haar dat die konsep van “familie” herhaaldelik in die boek voorkom. “Ek het ‘n bietjie gaan google en besef ek skryf ‘n sogenaamde ‘family drama’.”

Wat veronderstel was om ‘n dun romanse te wees, het uiteindelik ‘n dik familiedrama geword wat in ‘n tweede boek, Maanschijnbaai: Nan en Jeannie, voortgesit gaan word. “Die tweede boek gaan oor die ouma en die kleinkind. Nan glo in die krag van kristalle en Jeannie meen sekere kosse kan toor.”

Paul het beklemtoon dat ‘n mens vir die maksimum leesgenot die eerste boek moet lees voordat jy die tweede een aanpak. Dus moet lesers solank met Maanschijnbaai: Jo en Sue wegspring.

Kry ‘n voorsmakie van die boek deur die volgende video te kyk. Paul lees hier ‘n gedeelte uit Maanschijnbaai: Jo en Sue voor:

YouTube Preview Image

By LAPA se Leeskringseminaar 2012 was daar ook ‘n gesprek tussen Ingrid vander Veken en Antjie Krog oor die vertaling van Sam: ‘n Ware verhaal van ‘n dogtertjie en haar olifant uit Vlaams in Afrikaans. Lees die berig hier. Kyk ook uit op LAPA se blog op Books LIVE vir ‘n berig oor die praatjie wat Irma Joubert by die geleentheid gelewer het oor die vertaling van haar boeke in Nederlands.

* * * * * * * *

Carolyn Meads het regstreeks vanaf die bekendstelling met #livebooks getwiet:

* * * * * * * *

Facebook-galery

Boekbesonderhede

 

Please register or log in to comment